Stjórnsýsluhús Dalabyggðar,
    Miðbraut 11,
    370 Búðardal,
    kennitala: 510694-2019
    Sími: 430 4700

    dalir@dalir.is

Íbúagátt Endurvinnslukort

Spurningin

Hvað skoðar þú vef Dalabyggðar oft?
9. júlí 2014 14:29

Dalir og hólar 2014

Dalir og hólar 2014 – LITUR er myndlistasýning í Dölum og Reykhólasveit frá 5. júlí til 10. ágúst.

Á sýningunni eru verk eftir myndlistamennina  Bjarka Bragason, Eygló Harðardóttur, Gerd Tinglum, Loga Bjarnason og Tuma Magnússon. Sýningarstjórar eru Sólveig Aðalsteinsdóttir og Þóra Sigurðardóttir.

Sýningin kallast á við fyrri Dala og hóla-sýningar að því leyti að hún hefur að markmiði að taka þátt í mannlífi svæðisins, efna til samstarfs við heimamenn og leiða sýningargesti í ferðalag um þetta fjölbreytta og fallega svæði sem umlykur Breiðafjörðinn. Sýningin er á ýmsum stöðum á svæðinu og verkin geta verið staðsett t.d. á atvinnusvæði, í yfirgefnum húsum eða utandyra.

Þema sýningarinnar að þessu sinni er litur. Listamennirnir munu vinna verk sérstaklega fyrir sýninguna þar sem hugtakið litur verður skoðað út frá bæði hlutlægum og huglægum gildum. Viðfangsefnið er áhrif lita, vægi og merking þeirra í gegnum söguna, í umhverfi og listum.

Prentuð sýningarskrá er jafnframt kort af sýningarsvæðinu og veitir leiðsögn um það. Hún verður aðgengileg á helstu áfangastöðum á Vesturlandi.

Við Breiðafjörð og í Dölum hafa margir listamenn slitið barnsskónum eða unnið lífsverk sitt. Svæðið býr enda yfir fjölskrúðugri náttúru, fjölbreyttu fugla- og dýralífi, menningu og sögu. Þar má finna ótæmandi uppsprettu nýrra verka og nýsköpunar.

Myndlistasjóður styrkir Dali og hóla 2014. Framlag listamannanna, örlæti staðareigenda á svæðinu og stuðningur Ólafsdalsfélagsins, Nýpurhyrnu, Dalabyggðar/Byggðasafns Dalamanna, Reykhólasveitar, hafa gert þessa sýningu mögulega. 

Sýningarstaðir eru

  Byggðasafn Dalamanna á Laugum í Sælingsdal

  Skarðsstöð á Skarðsströnd

  Ytri-Fagridalur á Skarðsströnd

  Staðarhóll í Saurbæ

  Ólafsdalur í Gilsfirði

  Króksfjarðarnes, gamla kaupfélagshúsið

  Norðursalt á Reykhólum

  Grettislaug á Reykhólum

Dalir og hólar 2014 kort